富嘉閣租約滿結業 「阿一」徒弟：冇咩傷感

喺鰂魚涌開業13年、由粵菜名廚李文基擔任行政總廚嘅粵式酒樓「富嘉閣」噚日正式結業。李文基同Emily講，新冠疫情後生意有回升，亦都穩定，結業係因為舖位續唔到約。佢話富嘉閣經營傳統粵菜，亦會接納新事物，例如開發咗蠔仔春卷、石斑多士等新菜式。佢話每件事都有始有終，對結業冇特別傷感。

問被到會唔會東山再起，李文基話目前市道「水深火熱」，會暫時休息下先，除非搵到好條件、好位置，先至諗係咪再組班。佢回想富嘉閣喺2011年元旦開業，四季時令食材都會喺餐單呈現，多年嚟同食客建立咗唔少交情。

李文基係已故名廚、富臨飯店創辦人楊貫一「一哥」嘅徒弟，佢話有將「一哥」傳落嘅精神顯示畀食客，例如用砂鍋炒餸、蟹肉炒蛋等。佢又話店舖原址將會有人接手，裝修兩個月後開張，新老闆都想招聘舊員工，有人陸續面試。佢特別提到點心部4個同事有20至40幾年經驗，全部手做點心，簡單如鳳爪雞腳都係自己斬、自己燜、自己炸，「我哋有我哋嘅堅持，邊樣係做得好，辛苦啲都要繼續做番個工序」。

文：明報